Ahmeti: Shqipërinë e dua edhe kështu, ajo është nëna ime

Në intervistën e dhënë për gazetën "Ora News", kreu i BDI, Ali Ahmeti, sqaron dhe marrëdhëniet me Shqipërinë, duke u shprehur se e ka dashur dhe e do gjithmonë. Pasi për të, nëna duhet dhe ashtu e rreckosur, edhe në ditë të mira. Për të, Shqipëria ka qenë vendi ku kanë marrë forcë. Ai nuk mungon të shprehet se e ka të vështirë të vendosë për largimin nga politika.

Cilat janë raportet tuaja me Shqipërinë? Kur keni qenë për herë të parë në Shqipëri?

Në Shqipëri për herë të parë kam qenë në 1992.

Sa vjeç ishit?

33 vjeç.

Keni dashur të shkoni më përpara?

Kam dashur, por kam dashur si student në vitet '80, tani pasuan ngjarjen në '81-shin.

Ishit në Tiranë për të parë '92-ishin?

Po në Tiranë.

Ju zhgënjeu, ishte ajo që prisnit apo ishte më e idealizuar Shqipëria tek ju?

Unë jam një djalë që e dua nënën edhe kur është keq, edhe kur është leckosur, edhe kur është e sëmurë, sepse nëna nuk zëvendësohet me asgjë.

E keni treguar sepse kur keni dalë për herë të parë të votoni keni qenë dorë për dore me nënën tuaj...

Unë nënën e dua. Nuk kam qenë nga ata që mund të them se u zhgënjeva këtu, sepse nuk kisha krijuar iluzione se si mund të jetë Shqipëria, se Shqipëria mund të jetë një parajsë dhe tani të zhgënjehem se më doli ferr. Unë nënën e kam dashur dhe nëna duhet si nënë.

Ishit në legalitet në atë kohë?

Jo.

Nga '92-shi deri me 2001 kur ju ishit në krye të UÇK-së gjatë trazirave të marsit të atij viti. Sa herë shkuat dhe erdhët në Shqipëri dhe a keni pasur shok e miq, apo edhe kontakte me Tiranën zyrtare?

Nga '92-shi deri në '99-tën ne kemi pasë shumë lëvizje në Shqipëri, tani veç më ngushton të më pyesësh a ke qenë 20 herë apo 50 herë. Po e them në mënyrë simbolike, me më thënë që ke qenë 20 herë të them nuk e di, të me thuash që keni 50 herë nuk e di. Gryka e Otrantos ka qenë Shqipëria dhe a mund të hysh në Adriatik pa kaluar në grykën e Otrantos, nuk kalon dot dhe Shqipëria për ne ka qenë Otranto. Kemi kaluar në misione të ndryshme për në Kosovë, nëpër Shqipëri kemi pasur shumë kontakte me shumë njerëz, kam shumë miq, aq shumë miq janë saqë përsëri më ngushton të më pyesësh se sa është numri i tyre.

Kontaktet dhe raportet që keni me klasën politike shqiptare, si kanë qenë edhe si janë aktualisht?

Në vazhdimësi me klasën politike shqiptare kam pasur raporte të mira, sepse edhe interesa të tilla kanë qenë. Aktualisht gjithashtu i kemi të mira, si me partitë në pushtet, gjithashtu edhe me ato në opozitë. Në të kaluarën kemi pasur kontakte, me partitë në pushtet dhe opozitë. Mirëpo, e kaluara ka qenë një e kaluar me shumë ngarkesa dhe më tepër ka lindur që te jemi në kontakte me partitë në pushtet. Por, sot ne kemi raporte krejtësisht të tjera, ruajmë kontakte me të gjitha partitë politike në Shqipëri. Është një kënaqësi për ne nga mesazhet që morëm, nga të gjithë, qofshin në pozitë dhe opozitë, që ne shqiptarët duhet të përpiqemi të punojmë për të përparuar dhe si shqiptar në Maqedoni, pa parë nëse ka ndonjë përplasje në Shqipëri midis partive politike, qoftë për kod zgjedhor, nëse do të jetë kështu reforma zgjedhore apo do të jetë ashtu, a do të jetë me një zone apo do të jetë me 2 zona. Këto janë probleme që i takojnë Shqipërisë.

Ju si parti politike i përkisni krahut të majtë, qendrës së majtë?

Bashkimi Demokratik për Integrim është një parti tematike që ka terma shumë të rëndësishëm, siç është "Marrëveshja e Ohrit", implementimi i plotë i "Marrëveshjes së Ohrit", që do të thotë barazi të plotë për shqiptarët. Integrimi i shqiptarëve brenda shtetit të Maqedonisë, se por dikush edhe e keqinterpreton integrimin si asimilim. Integrim do të thotë të integrohesh edhe të mos humbësh vlerat e tua, siç është integrimi në Evropë. Cili vend i Evropës është asimiluar, Gjermania, Franca, Spanja, Italia. Do të thotë të respektohet diversiteti. Integrimi do të thotë i shqiptarëve në Maqedoni, në rajon, pse shqiptarët të mos kenë një qendër, për shembull, për studime albanologjike, ç'të keqe ka. Pse të mos ketë unionin e universiteteve shqipfolës që ligjërojnë shqip. Pse të mos e ketë? Pse të mos ketë një qendër etnokulturore për të gjithë shqiptarët. A i dëmton shqiptarët nëse ka një qendër për universitetet që ligjërojnë shqip. Kjo nuk është as Shqipëri e Madhe, as e vogël, por aty ku jetojnë, në atë hapësirë, pse të mos i ndërtojmë këto vlera të përbashkëta. Fundi i fundit, unë nuk e mohoj që jam shqiptar. Identiteti im, kombi im, gjaku im, është shqiptar dhe këtë nuk e mohoj dhe gjithë bota e di. Kosovar komb nuk ka, në Kosovë jetojnë shqiptarët, jetojnë serbët kosovar, sepse serbi që braktis Kosovën si del në Serbi, i thonë je kosovar, ik në vendin tënde andej. Kështu që, ka shumë gjëra që ne na presin si komb, por për t'i bërë në të ardhmen dhe nuk duhet hezituar. Përse të mos kemi një televizion për shembull, mbarëshqiptar, i gjithë shqiptarëve siç e kanë Austria, Gjermania dhe Zvicra. 3 sat, për shembull, përse të mos kemi një 3 sat?!

Besoj se zhvillimi i teknologjisë dhe teknologjitë digjitale, por edhe teknologjitë satelitore besoj se po e shohin dalëngadalë edhe këtë çështje. Kujt partie i jeni pranë në Shqipëri, me kë parti? Por, me sa duket, jeni i baraslarguar dhe barasafruar me të gjithë.


Raportet që keni me liderët politikë shqiptar? Kur shkoni në Tiranë, përveç atyre takimeve zyrtare, përveç kontaktit për çështje të rëndësishme politike që ju bashkojnë. A keni edhe miq në këtë klasë politike shqiptare?

Unë kam shumë miq dhe po të filloja me radhe... Në pjesën e elitës edhe ato janë në parti të ndryshme. Mirëpo unë i kam miq, që njihen duke filluar nga vitet '90-'92 edhe më herët ndoshta deri në ditët e sotme. Kemi kontakte me Kryeministrin e Shqipërisë, Presidentin, me partite politike në Shqipëri, kemi respekt reciprok. A janë të mëdha apo të vogla, në kongresin e Bashkimit Demokratik për Integrim ju jam mirënjohës, pjesa dërrmuese e partive kanë ardhur në kongresin që kemi mbajtur para dy vitesh. Duke filluar që nga Partia Demokratike deri te partitë më të vogla, si zoti Milo etj.

Kush është çmimi apo objektivi juaj final që keni në politikë?

Me duket se e sqarova se kush është objektivi im final në politikë. Sa më takon si shqiptar dua të krijojmë qendra të përbashkëta kulturore, arsimore, mediatike. Në rrafshin ndërkombëtar dua që Shqipëria, Maqedonia, Mali i Zi, Kosova, të jenë pjesë e BE-së dhe NATO-s. Në radhë të parë të NATO-s dhe pastaj në BE pas implementimit të standardeve, konform standardeve evropiane. Kurse për në NATO mendoj që janë diçka më përpara si Shqipëria ashtu edhe Maqedonia. Por edhe Kosova, sepse Kosova drejtpërsëdrejti ka prani të forcave të NATO-s në Kosovë. Por, Kosova edhe jo më shumë tanimë më optimist me vendosjen e misionit evropian që do t'i përshpejtoje këto standarde. Pikërisht ky komision i Evropës këtë rol e ka që sa më parë Kosovën ta afroj tek Evropa. Unë do të isha i lumtur sikur këto çështje që për mua janë ideale, Evropa e Bashkuar dhe NATO, një mision, t'i rrumbullakosnim me sukses. Pasi t'i rrumbullakosnim me sukses këto çështje, atëherë do të flasim dhe besoj se nuk do të jem i vjetër në moshë, akoma jam i ri, do të flasim për vizione të tjera, për çështje të tjera.

Pra, nuk e mendoni tërheqjen politike, e mendoni larg...?

Po edhe të mendoj që të tërhiqem, nuk më lëshojnë mua.

Kush?

Bashkëmendimtarët, bashkëluftëtarët, bashkëveprimtarët, se ndoshta kisha dashur të kaloj pak në pension të hershëm, por nuk ndryshoj.

E keni çuar ndonjëherë në pension të parakohshëm?

Po ta them sinqerisht, shumë familjarisht, shumë miqësisht. Rrugën nëpër të cilën ne kemi kaluar ka qenë një rrugë shumë e rëndë, e lodhshme, me shumë batica dhe zbatica. Me shumë emocione. Tamam ngjan si një trup me fut në kalorifer, prej kaloriferit e fut në frigorifer, nuk ka qenë e lehtë atë që kam përjetuar. Unë kam përjetuar 3 luftëra. Ta them unë, sepse si unë janë shumë shokë të mi. Ndoshta kemi nevojë që të pushojmë edhe të jetojmë edhe nga pak në këtë jetë si njerëz të lirë dhe pa ngarkesa.

Çfarë do të donit të bënit në jetën e lirë dhe pa ngarkesa politike?

Shumë miq më thonë që duhet të shkruaj memorien, duhet të shkruaj kujtime, a e din që këtë s'dua ta bëj. Kështu që, kemi nevojë të dalim edhe të lavdërojmë tokën, të dal edhe në pazar, të dalim edhe aty ku bëhet një dasmë e madhe.

Të kanë munguar toka? Të pëlqen t'i kthehesh fermës? Të jesh një fermer?

Më ka munguar dhe më pëlqen. Me kënaqësi nëse gjej pak kohe unë dalë me vëllanë dhe e shoqëroj vëllain tim me bagëti, veçse dal në mal dhe shoh ku lëvizet.

Mund të ndodh që të mund të takohemi pas jetës së 20 vjetësh në një sfidë të tillë, ju në mal me bagëti, me parmendë?

Unë edhe tani rri në mal me bagëti, pak kohë të lirë që të kem unë jam në mal.

Ju nuk i ndaheni malit dhe mali juve, qoftë kur keni qenë luftëtar i lirisë, qoftë tani në politike...

Problemi është që të shkurorëzohemi, divorc nuk mund ta bëjmë. Unë ndjej për 18 vite që nuk kam jetuar në vendin tim, unë kam ardhur, po kam ardhur fshehurazi, me misione, siç ka pas qenë. Por, unë nuk e kam shijuar erën, dritën e vendit tim. Gjithmonë kam lëvizur natën, ditën kam pushuar dhe kam nostalgji për 18 vjet. Unë dua pëllëmbë për pëllëmbë dua ta ec tokën, e ndjej këtë gjë, kam nostalgji për 18 vite. Ëndrrën për 18 vite e kam parë në vendin tim dhe nuk bëj demagogji, kur them që ëndrrën e kam parë. Kam qenë shumë i lidhur shpirtërisht, sa edhe vend më të bukur nuk ka.



Për Menduh Thaçin

"Jam përpjekur që me partitë politike shqiptare gjithmonë të krijojmë relacione të përafërta, që në luftën 2001 jemi përpjekur që shqiptarët të jenë unik. Mirëpo, dukshëm nga viti 2003 e këtej filloi një luftë goxha e ashpër nga partia e zotit Xhaferri në atë kohë dhe zoti Thaçi, duke e shpallur luftën e UÇK-se si tradhti kombëtare, duke shpallur Shtabin e Përgjithshëm si tradhtar të kombit".



Për pavarësinë e Kosovës

"Tani mendoj se në bazë të komenteve, Gruevski është autoritar, vendimet i merr shumicën e rasteve pa kolegjium partie apo institucioni qeverie, që ai drejton. Unë mendoj që Gruevski, sa më parë ta njohë Republikën e Kosovës, ndihmon për stabilitetin në rajon. Amerika e ka njohur pavarësinë e Kosovës. Përse tani heziton".