Thaçi ia hedh fajin Aliut

Kryetari i PArtisë Demokratike Shqiptare (PDSH) menduh Tha;i të hënën është takuar me kryeministrin Nikolal Gruevski, në të cilin takim ka deklaruar se zëvendës kryeministri Ymer Aliu deklaratën për bojkotim të institucioneve e ka dhënë kokë më vete. Tha;i të hënën pasdite është takuar edhe me ambasadorin britanik në Maqedoni Endrju Ki, pas të cilit takim ka konfirmuar se është takuar me Gruevskin. Ai ka përsëritur edhe qëndrimin se deklarata e Ymer Aliut për braktisje të institucioneve ka qenë deklaratë e dhënë kokë më vete, e jo qëndrim i PDSH-së. Të hënën pasdite pritej edhe takim i ri mes Tha;it dhe Gruevskit në të cilin pritej të kërkohet zgjidhje për funksionimin e mëtutjeshëm të koalicionit qeverisës. Ndryshe të hënën PDSH ka filluar bojkot të pjesërishëm të institucioneve. Ministrat dhe Zëvendësministrat nga radhët e PDSH-së të hënën nuk janë paraqitur në vendet e tyre të punës. Kjo erdhi pasi zëvendëskryeministri Imer Aliu të dielën kërkoi që të gjithë ministrat e PDSH-së të braktisin punën e Qeverisë së Nikolla Gruevskit. Deputetët dhe drejtorët nga radhët e PDSH-së si dhe funksionarët tjerë në eshalonët tjera kanë qenë në vendet e tyre të punës dhe do të presin vendim nga kryesia qendrore e partisë nëse do të bojkotojnë punën e institucioneve qeveritare. Mbledhja e kryesisë qendrore të PDSH-së të martën pritet të mbajë mbledhje për të vendosur nëse funksionarët e tyre do të braktisin tërësisht institucionet qeveritare. Partitë opozitare e kanë vlerësuar si tejet joserioze dhe të papërgjegjshme sjelljen e partnerëve të koalicionit në momentet kyçe për vendin.
Teura Arifi nga BDI-ja tha se PDSH-ja më së paku ka të drejtë t’iu bëjë thirrje shqiptarëve për lëshim të institucioneve. Ajo thotë se PDSH-ja nuk respektoi legjitimitetin e popullatës shqiptare. “Sjellja e përgjithshme e anëtarëve të koalicionit është tejet joserioze në këto momente të rëndësishme sa i përket anëtarësimit të vendit në NATO. Konsiderojmë se më së paku PDSH-ja ka të drejtë të bëjë thirrje të asaj natyre duke pasur parasysh që ishte kjo partia politike e cila nuk e respektoi legjitimitetin e popullatës shqiptare e cila përkundër këtij legjitimiteti pranoi në mënyrë inferiore të bëhet pjesë e një qeverie e cila asnjëherë nuk respektoi kërkesat e shqiptarëve”, tha Arifi. Ajo kritikoi PDSH-në se nuk vendosi në prioritetet e veta agjendën shqiptare.
Sipas saj, kjo qeveri e pakicës mund të merret vetëm me çështjet teknike dhe me asnjë çështje tjetër politike për arsye se s’ka mandat dhe legjitimitet.
Për PLD-në koalicioni VMRO-DPMNE dhe PDSH treguan një papërgjegjësi totale në këto momente kyçe për Maqedoninë. “Gjatë tërë kohës kemi potencuar se ata nuk janë në mundësi në mënyrë konstruktive ta udhëheqin shtetin. Në pyetjen nëse kryeministri Gruevski e ka ftuar PLD-në për të hyrë në Qeveri, Karevska tha se biseda të tilla s’ka pasur. “Ne kemi treguar qëndrimin tonë. Nuk jemi të disponuar të bëhemi pjesë e Qeverisë ku kryeministër do të jetë Nikolla Gruevski”, tha Roza Topuzova – Karevska.
Ndryshe, të premten e kaluar liderët e katër partive më të mëdha u morën vesh që të mbështetet qeveria e pakicës ku edhe pos largimit të PDSH-së, ministrat e saj do të kryenin çështjet teknike, por pas përplasjeve të fundit partia e Menduh Thaçit kanoset me rrëzimin e Qeverisë.