Thaçi s’shkon në Prishtinë, afrohet me “proserbin” Gruevski

Në takimin e së enjtes që ishte paraparë të zhvillohej në Prishtinë, nuk do të marrin pjesë krerët e PDSH-së dhe PPD-së, Menduh Thaçi dhe Abdylhadi Veseli. Thaçi pas takimit me Gruevskin, tha se vlerëson se nuk ka nevojë të marrë pjesë në takime që zhvillohen vetëm për të bërë marketing politik. “S’do të marr pjesë në atë takim, sepse qëllimi i tij është përfitimi i pikave politike, ndërsa ne kemi punë më të rëndësishme, se sa takime të tilla”, tha Menduh Thaçi. Kryetari i PPD-së, Abdylhadi Veseli mospjesëmarrjen në takimin e paraparë në Prishtinë e ka arsyetuar duke thënë se agjendën e ka të ngjeshur dhe se nuk ka mundur të gjejë kohë. “Për shkak të agjendës tonë tepër të ngarkuar që ka të bëjë me bisedimet që zhvillohen me kryeministrin e Maqedonisë, nuk do të kem mundësi të marr pjesë në takimin e së enjtes që keni thirrur me liderët e partive shqiptare në Maqedoni”, ka thënë në letrën e tij, Veseli. Të mërkurën kryeministri i Kosovës, Hashim Thaçi i ka dërguar ftesw kryetarit tw BDK-së, Hysni Shaqiri. Një ditë më parë kreu shtetëror i Kosovës, u dërgoi ftesa liderëve të BDI-së, PDSH-së, BDSH-së dhe PPD-së, Ali Ahmetit, Menduh Thaçit, Bardhyl Mahmutit dhe Abdylhadi Veseli në takime të ndara me krerët e Kosovës. Takimet janë iniciuar nga presidenti i Kosovës, Fatmir Sejdiu. Nga ana tjetër të mërkurën kryeministri Nikolla Gruevski ka realizuar takime të veçanta me liderët e partive kryesore në vend. Ai takimin e ka filluar me kryetarin e PDSH-së, Menduh Thaçin, më pas me liderin e BDI-së, Ali Ahmetin dhe kryetaren e LSDM-së, Radmilla Sheqerinska. Thaçi pas takimit tha se propozimet e fundit të ndërmjetësuesit Metju Nimic janë të vjetra dhe të refuzuara disa herë nga ana e Maqedonisë. “Shpresoj se të gjithë do të punojmë në këtë proces që të ketë fund të mirë. Tek së pari na presin negociata të fuqishme”, deklaroi lideri i PDSH-së Menduh Thaçi. Në pyetjen e gazetarëve cila është tani pozita e PDSH-së në Qeveri, Thaçi u përgjigj se partia e tij vetëm politikisht e ka braktisur koalicionin. “Tani qëndrojmë para incidentit që e shkaktoi deklarata e zëvendëskryeministrit Imer Aliu. Përparësi duhet t’i jepet dialogut dhe bisedimeve, e pastaj të merren vendimet e ndryshme”, tha Thaçi. Sipas tij, ende është herët të thuhet për cilat nga çështjet e hapura ekziston pajtueshmëri mes PDSH-së dhe Qeverisë. Pas takimit të Ahmetit me Gruevskin, BDI ka lëshuar një kumtesë në të cilën thuhet se Ahmeti dhe Gruevski kanë diskutuar për rrjedhën e negociatave që po zhvillohen në Vjenë për zgjidhjen e kontestit për emrin me Greqinë. “Në rrethanat aktuale kur vendi është i përfshirë nga një krizë e thellë qeveritare, komunikimi i drejtpërdrejtë mes të gjithë faktorëve politikë është i domosdoshëm. Si pjesë e konsultimeve intensive mes faktorëve relevantë politikë të vendit dhe të rajonit pas shpalljes së pavarësisë së Kosovës dhe në pritje të ftesës për anëtarësimin e Maqedonisë në NATO, Ahmeti të enjten do të udhëtojë në Prishtinë, ku me ftesë të kryeministrit të Kosovës, do të realizojë takime me zyrtarët më të lartë të shtetit të Kosovës. Gruevski po ashtu është takuar edhe me kryetaren e LSDM-së, Radmilla Shekerinska, ndërsa takim është caktuar takim edhe me presidentin Branko Cërvenkovski.


SHBA: Nuk është koha për lojëra politike

Ambasadorja amerikane Xhilian Millovanoviq është takuar me liderët e PDSH-së Menduh Thaçi dhe liderin e BDI-së Ali Ahmetin. Në këto takime është diskutuar situata e fundit në skenën politike në vend si dhe çështja e emrit. Porosia e SHBA-ve është se Maqedonisë i nevojitet stabilitet dhe funksionimi i institucioneve për hyrje në NATO. “SHBA u sugjeron liderëve politikë të Maqedonisë të mbështesin sa më shpejtë gjetjen e një zgjidhje të çështjes së emrit”, thuhet në një deklaratë të lëshuar nga ambasada amerikane në Shkup, pas këtyre takimeve. “Tashmë nuk është koha për lojëra politike. Tani është koha që të lihen mënjanë llogaritjet politike dhe partiake”, thuhet në deklaratë. SHBA thotë se dëshiron anëtarësimin e Maqedonisë në NATO. Po ashtu takim me përfaqësuesit e ambasadës amerikane ka realizuar edhe kreu i PPD-së, Abdylhadi Veseli.


Thaçi: E di datën kur Maqedonia do ta njohë Kosovën

Kreu i PDSH-së, Menduh Thaçi tha se e ka të njohur datën kur Maqedonia do ta njoh Kosovën, por datën nuk e di kryeministri i Kosovës. “Hashim Thaçi mendon se ai është kryeministër i Maqedonisë. Nga ana e tyre ka pasur deklarata të palejueshme dhe të gabuara, të cilët këtu kanë krijuar probleme”, tha Thaçi. Sipas tij, e gabuar është edhe deklarata e zëvendëskryeministrit të Kosovës lidhur me demarkacionin e kufirit me Maqedoninë. “Për dy-tri ditë do të tejkalohet kjo situatë, pasi që të enjten ose të premten, sipas njohurive të mia, do të takohen komisionet dhe do të fillojë zgjidhja e problemit rreth demarkacionit”, potencoi Thaçi.