Ademi: PDSH t’u kërkojë falje shqiptarëve

"I porosis krerët e PDSH-së, duke filluar nga Menduh Thaçi e deri te i fundit se ata nuk kanë të drejtë morale e as mandat politik t’u drejtohen shqiptarëve me kështu kërkesë absurde”, tha për “Alsat – M”, Xhevat Ademi, anëtar i Kryesisë së BDI-së.

Reagimi i BDI-së, erdhi pas prononcimit të nëkryetarit të Qeverisë, Imer Aliu, se funksionarët e partisë së tij nuk do të punojnë më për Nikolla Gruevskin.
“I këshilloj të bëjnë të vetmen gjë të logjikshme, t’u kërkojnë falje shqiptarëve për poshtërimin dhe degradimin e vullnetit politik, që ata duke u bërë instrumentë të Nikolla Gruevski ia bënë shqiptarëve para vitit 2006. I porosis t’u kërkojnë falje shqiptarëve për të gjithë ata djem të rinj, ish-ushtarë të vrarë nga viti 2006 e deri në Brodec, i porosis të dalin publikisht dhe t’u kërkojnë falje biznesmenëve shqiptarëve për reketin dhe terrorin e ushtruar mbi ata këto 19 muaj, i porosis të dalin e t’u kërkojnë falje shqiptarëve për faktin se deputetin e 18 të BDI-së në zonën e 6-të ia falën Nikolla Gruevskit, i porosis të dalin t’u kërkojnë falje shqiptarëve për të gjitha të këqijat që këto 18, 19 muaj ua bënë shqiptarëve, dhe do të ishin më të lumturit e botës nëse shqiptarët do tua falin”, tha Xhevat Ademi.